Liberté-gangné, poème de Daniel Berté

Wou woch ki pété pwent-pié-mwen

Pas ou touvé man té ka drivé trop

Té ka maché trop

Té ka soté trop

Té ka kouri trop

Wou kout-pwen ki krazé bò djol-mwen

Pas ou touvé man té ka palé trop

Té ka diskité trop

Té ka protesté trop

Té ka kontesté trop

Wou koutla ki flandjé ponyet-mwen

Pas ou touvé man té ka matjé trop

Té ka djoubaké trop

Té ka karésé trop

Té ka kaliné trop

Wou pansé ki baré lespri-mwen

Pas ou touvé man té ka réfléchi trop

Té ka imajiné trop

Té ka propozé trop

Té ka espéré trop

Zot, woch, kout-pwen, koutla, pansé,

Ki frennen-mwen

Ki krazé-mwen

Ki flandjé-mwen

Ki baré-mwen

Man ka pran-zot an men

Pou déblotjé

Pou débaré

Pou trapé

Pou gangné

Liberté-mwen